Türkmenistanyň halkalaýyn energetika ulgamyny döretmek işi ýylyň ahyryna çenli tamamlanar
Türkmenistanyň halkalaýyn energetika ulgamynyň möhüm bölegi bolan Balkan – Daşoguz we Ahal – Mary ugurlary boýunça gurluşyk-gurnama işlerini 2023-nji ýylyň ahyryna çenli tamamlamak meýilleşdirilýär. Bu barada wise-premýer Baýmyrat Annamämmedow şu gün metbugatda çap edilen makalada mälim edýär.
Bu böleklerde gurluşyk işleriniň tamamlanmagy ýurdumyzyň bitewi halkalaýyn energetika ulgamyny kemala getirmekde möhüm ädim bolar. Ol öz gezeginde ýurdumyzyň ähli sebitlerini energiýa bilen bökdençsiz üpjün etmäge we zerur ýerlere paýlamaga şert döreder.
2021-nji ýylda ýurdumyzyň merkezi sebitini Hazar kenaryndaky iri senagat zolaklary bilen birleşdirýän bu halkalaýyn energetika ulgamynyň Ahal – Balkan bölegi ulanmaga berildi.
Gurbanguly Berdimuhamedowyň başda durmagynda Ahal – Balkan, Balkan – Daşoguz we Ahal – Mary ugurlary boýunça halkalaýyn energetika ulgamyny döretmek üçin ýokary woltly asma elektrik geçirijileriniň hem-de beketleriniň gurluşygyna badalga berildi.
ORIENT news
