Türkmenistanyň Halk Maslahatynyň Başlygy bilen Sankt-Peterburgyň gubernatory ikitaraplaýyn gatnaşyklary ara alyp maslahatlaşdylar
Türkmenistanyň Halk Maslahatynyň Başlygy Gurbanguly Berdimuhamedow duşenbe güni Sankt-Peterburgyň gubernatory Aleksandr Beglow bilen duşuşdy.
“Sankt-Peterburgyň hökümeti Türkmenistan bilen gatnaşyklaryň syýasy we ykdysady ähmiýetini oňat düşünýär. Biz bu gatnaşyklary halkara derejesinde-de ileri tutýarys. Gatnaşyklarymyz, ýurtlarymyzyň Prezidentleri tarapyndan alnyp barylýan strategiki hyzmatdaşlygy çuňlaşdyrmak syýasatyna doly gabat gelýär” diýip, Aleksandr Beglow belledi.
Gubernator, Türkmen halkynyň Milli Lideri bilen bolan duşuşygynda Sankt-Peterburg bilen Türkmenistanyň arasyndaky gatnaşyklaryň ýokary we ynamdar derejä ýetendigini, söwda-ykdysady, medeni-ynsanperwer hyzmatdaşlygy taslamalarynyň şeýle-de taraplaryň wekiliýetleriniň özara saparlarynyň ikitaraplaýyn gatnaşyklaryň ösdürilmegine ýardam berýändigini nygtady. Bu barada gubernatoryň metbugat gullugy habar berýär.
Aleksandr Beglowyň pikiriçe, medeni gatnaşyklar hem möhüm ähmiýete eýedir. Hususan-da, Sankt-Peterburgda türkmen edebiýatynyň nusgawy şahyry Magtymguly Pyragynyň ýadygärligini oturtmak meselesi çözülýär. Ony şäheriň taryhy merkezinde - Petrogradskiý etrabynyň Çkalowskiý prospektindäki 15-nji jaýyň golaýyndaky seýilgähde ýerleşdirmek kararyna gelindi.
“Biz Türkmenistanda Beýik Watançylyk urşunyň ýadygärligini goramaga berilýän ünse ýokary baha berýäris. Şu aýda Leningradyň goranmak we gabaw muzeýinde “Leningrady goramakda türkmenler” atly medeni-magaryf çäresi geçiriler” diýip, Aleksandr Beglow aýtdy.
Aleksandr Beglowyň ýolbaşçylygyndaky Sankt-Peterburgyň wekiliýetiniň häzirki wagtda Aşgabat şäherine resmi sapary dowam edýär. Gubernatory Türkmenistanyň Prezidenti Serdar Berdimuhamedow hem kabul etdi.
ORIENT news
