Türkmen wekiliýeti “EKSPO - 2023” sergisine taýýarlyk görmek üçin Doha şäherinde iş saparynda boldy
Türkmenistanyň Söwda-senagat edarasynyň başlygy M.Gurdowyň ýolbaşçylygyndaky wekiliýet topary “EKSPO ─ 2023” halkara sergä taýýarlyk meselelerini ara alyp maslahatlaşmak üçin Katar Döwletinde iş saparynda boldy we taýýarlyk meseleleri bilen baglanyşykly maslahata gatnaşdy.
“EKSPO ─ 2023 Doha” halkara sergisi 2023-nji ýylyň 2-nji oktýabryndan 2024-nji ýylyň 28-nji martyna çenli «Daşky gurşawyň hatyrasyna ýaşyl tebigat» atly şygar bilen geçiriler. Maslahata gatnaşmak üçin 70-den gowrak ýurtdan wekiliýet çagyryldy.
Maslahatyň gün tertibine gurluşyk meýdançasyny we sergi zolaklaryny dolandyrmak bilen baglanyşykly guramaçylyk, saglyk, howpsuzlyk, ulag, logistika we aragatnaşyk meseleleri hem-de bu halkara sergisiniň geçýän wagtynda çärä gatnaşýanlara hödürlenýän hyzmatlar we başga-da birnäçe meseleler girizildi.
Maslahata serginiň guramaçylyk toparynyň Baş komissary Bader Al Dafa, Halkara sergiler býurosynyň Baş sekretary Dimitriý Kerkenzes, Halkara bagbançylyk birleşiginiň Baş sekretary Braýrklif gatnaşdy.
Saparyň dowamynda Türkmenistanyň Söwda-senagat edarasynyň başlygy M.Gurdow bilen Baş komissar Bader Al Dafanyň arasynda ikitaraplaýyn gepleşik geçirildi. Onda taraplar Türkmenistanda we Katar döwletinde aýratyn ähmiýet berilýän daşky gurşawy goramak boýunça alnyp barylýan işleri ara alyp maslahatlaşdylar. Şeýle hem, EKSPO ─ 2023” sergisiniň çäklerinde Türkmenistanyň Milli gününde geçirilmegi meýilleşdirilýän çärelere uly üns berildi. Saparyň çäklerinde gurluşyk we daşky bezeg işleriniň gidişi bilen tanyşmak üçin sergi meýdançasyna gezelenç guraldy.
ORIENT news
