Ýaponiýanyň Türkmenistandaky ilçisi ýurtda dzýudo ösüşiniň derejesine ýokary baha berdi
Ýaponiýanyň Türkmenistandaky ilçisi Ýamamoto Hiroýuki ýurdumyzyň dzýudo federasiýasynyň başlygy Welmyrat Gurbanmyradow we Türkmenistanyň milli dzýudo toparynyň ýapon tälimçisi Kazuhiko Tokuno bilen duşuşdy diýip, Ashgabatdaky diplomatik wekilhanasynyň metbugat gullugy habar berýär.
Ilçi Ýamamoto Hiroýuki dzýudo federasiýasynyň wekiline Türkmenistanda bu sporty ösdürmekde gazanan üstünlikleri üçin Ýaponiýanyň Daşary işler ministriniň Hormat hatyny gowşurdy.
Dzýudo federasiýasy türkmen türgenleriniň arasynda bu sportuň ýaýramagyna we meşhur bolmagyna goşant goşup, yzygiderli milli ýaryşlary guraýar.
2006-njy ýylda federasiýa döredilenden şu güne çenli Türkmenistanda dzýudoçylaryň sany 500-den 6000 adama çenli artdy.
Häzir Ýaponiýaly tälimçi Kazuhiko Tokunonyň ýolbaşçylygyndaky Türkmenistanyň milli dzýudo topary saýlama ýaryşlaryna taýýarlanýar we Parižde 2024-nji ýylda geçiriljek Olimpiýa oýunlarynda medal gazanmagy umyt edýär.
Mundan başga-da, şu aý türkmen dzýudoçylary üçin diýseň täsirli bolar. Türgenler Horwatiýada Gran-pri, Gazagystanda geçiriljek “Uly tuwulga” ýaryşyna gatnaşarlar, ýaş dzýudoçylar bolsa, Zagrebde (Horwatiýa) geçiriljek dünýä çempionatynda baýrak almak üçin bäsleşerler.
ORIENT news
