Türk uniwersitetiniň wekilleri türkmen ilçisi bilen duşuşdy
Türkiýäniň Kappakodiýa uniwersitetiniň wekilleri Türkmenistanyň Ankara şäherindäki ilçihanasyna sapar bilen baryp, ilçi Mekan Işangulyýew bilen duşuşdy. Bu barada "FIB" habarlar agentligi mälim edýär.
Duşuşygyň barşynda, Kappakodiýa uniwersitetiniň prorektory Wasile Şenol uniwersitetiň alyp barýan akademiki işleri bilen diplomatik gullugyň wekillerini tanyşdyrdy. Uniwersitetiň fakultetleri, umumy ýaşaýyş jaýlary, olaryň aýratynlyklary hem-de magistratura we doktorantura derejelerinde bilim berlişi barada giňişleýin durlup geçildi. Türkmen diplomatlary uniwersitetde alnyp barylýan ylmy işler, munuň üçin döredilen mümkinçilikler, talyp hakly okuwlaryň hödürlenişi bilen tanyş boldular.
Kappakodiýa uniwersitetiniň ýaşlara ýokary bilim bermekde daşary ýurt döwletleri bilen hyzmatdaşlyk etmäge meýillidigi bellendi. Açyk maglumat çeşmelerine görä, Türkiýäniň ýokary okuw mekdeplerinde 15 müňden gowrak türkmen raýaty bilim alýar.
ORIENT news
