Wengriýa Türkmenistanyň Ähliumumy howpsuzlyk strategiýasy boýunça teklibini goldaýar
Wengriýa Türkmenistanyň BMG-ä hödürlemegi meýilleşdirýän Ähliumumy howpsuzlyk strategiýasyny işläp düzmek boýunça teklibini goldaýar - diýip, Daşary işler ministri Peter Siýýarto penşenbe güni türkmen kärdeşi Raşid Meredow bilen telefon arkaly söhbetdeşlikden soň mälim etdi.
Siýýarto “BMG-niň Düzgünnamasyny berkitmäge, gapma-garşylyklary syýasy taýdan parahatçylykly çözmäge we uruşlaryň öňüni almak üçin diplomatik tagallalary goldamaga gönükdirilen her bir teklip häzirki wagtda möhümdir” – diýip, Facebookda ýazýar. Wengriýanyň MTI telegraf agentligi ministriň: “Häzir BMG-niň Düzgünnamasyny we onda kesgitlenen maksatlary ýerine ýetirmegi üpjün etmegiň tüýs wagty” – diýen sözlerini getirýär.
Wengriýanyň Daşary işler ministri: “Biz dünýäniň islendik künjeginde, aýratyn-da biziň goňşy ýurdumyzda parahatçylyga getirjek hemme zady goldaýarys” – diýip, ministr bu babatda öz garaýşyny türkmen kärdeşine hem tassyklandygyny belledi.
Ozal Türkmenistan BMG-niň Baş Assambleýasynyň 78-nji mejlisinde ileri tutýan garaýyşlaryny beýan edipdi.
Şeýlelikde, Türkmenistan bolup geçýän wakalara we tendensiýalara oýlanyşykly, ideologiýalaşdyrylmasyz baha bermek, dünýä syýasatynda ynamsyzlygy we gapma-garşylykly dartgynlygy ýeňip geçmek hem-de ylalaşyklylyk we gyzyklanmalaryň özara hasaba alynmagy üçin geljegi kesgitlemäge synanyşmak maksady bilen BMG-niň mümkinçiliklerinden peýdalanmagy zerur hasaplaýar.
Bu nukdaýnazardan, Türkmenistan Ähliumumy howpsuzlyk strategiýasyny işläp düzmegiň mümkinçiliklerini ara alyp maslahatlaşmaga girişmegi teklip edýär.
ORIENT news
