Hazaryň türkmen kenarynda Türkmenistanyň Döwlet serhet gullugynyň täze binalar toplumy açyldy
Sişenbe güni Hazar deňziniň kenarynda harby we hukuk goraýjy edaralaryň ýolbaşçylarynyň gatnaşmagynda Türkmenistanyň Döwlet serhet gullugynyň täze binalar we desgalar toplumy açyldy.
Täze toplumda ornaşdyrylan tehnologiýalaryň, sanly ulgamyň, elektron kartanyň kömegi bilen Hazar deňzindäki ýolagçy we harby gämileriň hereketlerini synlamak, olaryň ýangyç we suw üpjünçiligini kesgitlemek bolýar. Harby işgärleri taýýarlamak üçin göz öňünde tutulan okuw binasy hem döwrebap talaplara laýyklykda enjamlaşdyryldy.
Serhet gullugynyň desgalar toplumynyň açylyş dabarasynda patrul gämisinde Türkmenistanyň Döwlet baýdagy we ýurduň Harby-deňiz güýçleriniň baýdagy dabaraly ýagdaýda galdyryldy.
Çärä gatnaşyjylara suwdan geçip, ýeňillik bilen kenara çykan ýokary ýokary tizlikli amfibiýa gämisi görkezildi.
Serhet gullugynyň desgalar toplumynda zerur bolan enjamlar bilen üpjün edilen 200 orunlyk ýatakhananyň binasy, lukmançylyk bölümi, naharhana, aşhana, çörek bişirilýän ýer, azyk ammary, gämi duralgasy ýerleşýär. Şeýle hem täze toplumyň çäginde üsti açyk we ýapyk sport meýdançalary döredildi. Olaryň birinde harby serhetçileriň görkezme çykyşlary gurnaldy.
Mundan başga-da, toplumda ýanaşyk ýerleri abadanlaşdyrylan hersi 48 öýli 3 gatly ýaşaýyş jaýlarynyň 2-si bina edildi we ol ýerde çagalar üçin meýdançalar döredildi.
Serhet gullugynyň täze binalar toplumynyň işe girizilmegi mynasybetli awtoulaglar döwlet baştutanynyň adyndan oňa geçirildi. Täze toplumyň açylyş dabarasynyň çäklerinde Türkmenistanyň Döwlet serhet gullugynyň täze desgalar we binalar toplumyna Türkmenistnyň Prezidentiniň adyndan awtoulag serişdeleri gowşuryldy.
ORIENT news
