Gyrgyzystanda geçiriljek ýaşlar forumyna türkmen wekiliýeti gatnaşar
Gyrgyzystanyň Çolpan-Ata şäheri Çingiz Aýtmatowyň 95 ýyllygyna bagyşlanan Merkezi Aziýa ýaşlar forumyna gatnaşyjylary garşy aldy. AKIpress agentliginiň berýän habaryna görä, köpsanly delegatlaryň arasynda Türkmenistandan gelen ýaşlar hem bar.
Duşuşyk 10-11-nji awgustda Çolpan-Atadaky Issyk-Kul kölüniň kenarynda geçiriler. Çäräniň maksady ýaşlaryň we jemgyýetiň ösüşine goşant goşup, pikir alyşmak, bilim we tejribe paýlaşmak üçin platforma döretmekden ybarat. Maslahata Merkezi Aziýanyň dürli ýurtlaryndan ýaşlar guramalarynyň ýolbaşçylary, aktiwistler, döwlet we hökümete dahylsyz guramalaryň wekilleri gatnaşarlar.
Ýaşlar dürli derwaýys meseleleri ara alyp maslahatlaşarlar. Mysal üçin, häzirki zaman dünýäsinde medeniýetiň tutýan orny we ýaşlaryň şahsyýetiniň we milli aňynyň kemala gelmegi, sebitde döredijilik pudaklarynyň ösmegi we bu pudagyň sosial-medeni dürlülige goşýan goşandy barada pikir alyşarlar. Şeýle hem gün tertibine oba hojalygyndaky innowasiýalar, ýaş döwlet işgärleri we başga meseleler girýär.
Forum Gyrgyzystanyň Medeniýet, maglumat, sport we ýaşlar syýasaty ministrligi tarapyndan gurnaldy.
ORIENT news
