Türkmenistan we Ýaponiýa Osakada geçiriljek Expo 2025 sergisine gatnaşmaga taýýarlygyň barşyna garadylar
Türkmenistanyň Tokiodaky ilçihanasynda geçirilen duşuşykda Osakada geçiriljek Expo 2025 Bütindünýä sergisinde Türkmenistanyň milli pawilýonynyň gurluşygyna garaldy. Duşuşyga diplomatlardan başga-da Ýaponiýanyň Ykdysadyýet, söwda we senagat ministrliginiň wekilleri hem-de milli pawilýonyň taslamasynyň durmuşa geçirilmegi tabşyrylan Belli ES türkmen kompaniýasynyň wekilleri gatnaşdylar.
Ýapon tarapy 2025-nji ýylyň 13-nji aprelinden 13-nji oktýabry aralygynda geçiriljek sergä gatnaşmak boýunça türkmen hyzmatdaşlary bilen netijeli hyzmatdaşlygy belläp geçdi.
Expo 2025 Osaka sergisiniň "Durmuşymyz üçin geljegiň jemgyýetini döretmek" atly mowzugy adamlary nädip ýaşamak isleýändikleri we öz mümkinçiliklerinden nähili peýdalanyp boljakdygy hakda oýlanmaga mejbur edýär. Bu tema şeýle hem, adamlaryň nähili ýaşamak isleýändikleri baradaky pikirlerini goldaýan durnukly jemgyýet gurmakda halkara jemgyýetçiliginiň bilelikdäki döredijiligine höweslendirmäge gönükdirilendir.
Serginiň mowzugy ömri halas etmek, durmuşy hukuklaryny we mümkinçiliklerini giňeltmek hem-de ömürleri birleşdirmek ýaly ugurlara bölünýär. Saving Lives saglygy goraýyş, howpsuzlyk üpjünçiligi, betbagtçylyk töwekgelçiligini azaltmak we tebigat bilen sazlaşykly ýaşamagy öz içine alýar.
Empowering Lives adamlaryň durmuşynyň hiline we uzak aralykdan bilim ýaly mümkinçilikleri giňeltmäge ünsi jemleýär. Connecting Lives jemgyýetiň gatnaşygy, hyzmatdaşlygyň we bilelikdäki döredijiligiň güýjüne, öňdebaryjy kommunikasiýalara we maglumatlara esaslanýan geljegi taslamaga gönükdirilendir.
ORIENT news
