Ýaşlar Aşgabatdaky tomusky maksatnama kurslarynda telekeçilik ukyplaryny «kämilleşdirdiler»
Aşgabatda ýaşlaryň başarnyklaryny ösdürmek – 2023 tomusky maksatnamasy tamamlandy. Üç hepdelik okuw «Türkmenistanyň Ykdysadyýetçiler Bileleşigi» Milli Jemgyýetçilik birleşmesi we ABŞ-nyň Halkara Ösüş Agentliginiň (USAID) häzirki zaman hünär endiklerini ösdürmek baradaky taslamasy tarapyndan gurnaldy.
Maksatnama her ýyl 15-nji iýulda bellenilýän Bütindünýä ýaşlar başarnyklary gününe bagyşlandy. Taslama gatnaşmak üçin bäsdeşlik esasynda 17-25 ýaş aralygyndaky 40 ýaş saýlandy. Olar döwrebap dünýäde işe ýerleşmek we karçera gurmak üçin zerur bolan şahsy, telekeçilik we sanly endikleri ösdürdiler. Maksatnamanyň esasy maksady – zähmet bazaryndaky ýaşlaryň bäsdeşlige ukyplylygyny ýokarlandyrmak.
Ykdysadyýetçiler Bileleşigi USAID-iň goldamagynda birnäçe ýyl bäri giňişleýin maksatnama alyp barýar we üç basgançakda amala aşyrylýar: şahsy başarnyklary ösdürmek (ýumşak endikler) boýunça okuwlar, telekeçilik esaslaryny öwretmek we telekeçiligi meýilleşdirmek boýunça okuwlar hem-de üstünlikli işe ýerleşmek we häzirki zaman ofisinde işlemek üçin zerur bolan sanly başarnyklary öwretmek boýunça okuwy. Ykdysadyýetçiler birleşiginiň milli hünärmenleri we diplomly tälimçileri okuwy türkmen we rus dillerinde geçirdiler.
Taslama gatnaşyjylar hünär taýdan özüňi kesgitlemek, öz mümkinçiligiňi dolandyrmak, işewürligi meýilnamalaşdyrmagyň we öz işiňi alyp barmagyň esaslary, ulgamda özüni howpsuz alyp barmak we häzirki zaman ofisinde işlemek ýaly möhüm we aktual mowzuklarda nazaryýet bilimleri we amaly endikleri aldylar; maksatnamanyň çäginde ýaşlar üstünlikli işe ýerleşmek üçin esasy usullary we gurallary özleşdirdiler.
Okuwlardan başga-da, ýaşlar üçin türkmen işewür toparlarynyň wekilleri bilen ussatlyk sapaklary we duşuşyklar guraldy. Şeýle hem, ýaşlar hakyky iş berijileriň gatnaşmagynda bilim iş ýarmarkasyna gatnaşmak üçin özboluşly bir mümkinçilik aldylar. Bu bolsa gatnaşyjylara gazanylan başarnyklary we iş gurallaryny mümkin boldugyça has ýakyn şertlerde ulanmaga mümkinçilik berdi.
Tomusky kurs 29-njy iýulda «Meýilnama, önüm, tanyşdyryş» bäsleşigi bilen tamamlandy. Maksatnama gatnaşyjylar – düzümine Türkmenistanyň ykdysadyýetiň dürli pudaklaryndan tejribeli işewür wekilleri, şeýle hem elektron habar beriş serişdeleriniň ýolbaşçylary öz iş pikirlerini emin agzalaryna hödürlediler. Işler, birnäçe ölçegde, şol sanda pikiriň täzeligi we hakykylygy, işewürlik meýilnamasynyň we marketing strategiýasynyň işlenip düzülmegi, şeýle hem gatnaşyjylaryň tanyşdyryş ukyplary boýunça bahalandyryldy. Bäsleşigiň ýeňijileri maksatnamany gurnaýjylardan baýrak aldylar we taslama gatnaşyjylar okuwy geçendigi barada şahadatnama aldylar.
ORIENT news
