Kuraş sporty boýunça ýurdumyzyň türgenleri Gyrgyzystana okuw-türgenleşik ýygnanyşygyna ugrarlar
30 sany türkmen göreşçileri, şolaryň hatarynda 16 sany zenan we 14 sany erkek türgen öňdäki boljak sport ýaryşlaryna taýýarlyk görmek üçin 2-25-nji awgust aralygynda türgenleşik ýygnanşygyny geçirerler. Gürrüň sentýabr-oktýabr aýlarynda Hytaýda geçjek Aziýa oýunlary hem-de Aşgabatda geçirilmegi göz öňünde tutulýan Kuraş boýunça Dünýä çempionaty barada barýar.
Bu barada Türkmenistanyň Kuraş göreşi Federasiýasynyň baş kätibi Öwezmuhammet Atalyýew “Türkmenistan” gazetine beren interwýusynda habar berdi.
Bellenişi ýaly, ýerlerde geçirilen türgenleşikden soňra, türgenler Gyrgyzystanyň Issyk-köl sebitine ugrarlar we bu ýerde 17-nji sentýabra çenli türgenleşik geçerler. Soňra göreşçiler ýurdumyzda türgenleşik geçerler. Hytaýa 66, 90, 52 we 78 kilogram agram derejelerindäki 6 türkmen göreşçisi ugradylar.
Şeýle hem Aziýa oýunlary bilen Dünýä çempionaty aralygyndaky wagtda türgenleriň daşary ýurda nobatdaky okuw-türgenleşik ýygnanyşyklaryna ugradyljakdygy bellenilýär. Aşgabatda geçiriljek Dünýä çempionatynda türkmen erkek türgenleri 8 sany agram derejesinde, zenanlar bolsa 7 sany agram derejesinde çykyş ederler.
Şeýle hem Dünýä çempionatyny geçirmäge taýýarlyk görmegiň çäklerinde Türkmenistana Halkara kuraş assosiasiýasynyň wekilleriniň gelmegine garaşylýar. Şol saparyň çäklerinde ýaryşyň Düzgünnamasy işlenip taýýarlanylar. Bu Düzgünnamada ýaryş baradaky ähli maglumatlar jikme-jik görkeziler.
ORIENT news
