Aşgabatda göreş boýunça geçiriljek dünýä çempionatynyň senesi kesgitlendi
Türkmenistanyň Bedenterbiýe we sport boýunça döwlet komiteti, Halkara Göreş assosiasiýasy bilen bilelikde 2023-nji ýylyň 23-28-nji noýabrynda Aşgabatda göreş boýunça dünýä çempionatyny geçirer. Degişli karara Prezidentimiz Serdar Berdimuhamedow gol çekdi.
Resminamada, bedenterbiýe we sport boýunça döwlet komitetine Halkara Göreş assosiasiýasy bilen bilelikde çempionaty geçirmegiň düzgünnamasyny işläp düzmek we tassyklamak görkezilýar diýip, türkmen döwlet radio we telewideniýesiniň habarlar gullugy habar berýär.
Ýaryşlar türkmen paýtagtynyň Olimpiýa şährçesiniň söweş sungat toplumynyň esasynda geçiriler.
Resminamanyň sözbaşynda Türkmenistanyň bu dünýä çempionatyny «halklaryň arasyndaky dostluk we hoşniýetli goňşuçylyk gatnaşyklaryny has-da berkitmek, bedenterbiýe we sporty ösdürmek, jemgyýetde sagdyn durmuş ýörelgelerini işjeň wagyz etmek, ýaş nesli sporta, şeýle hem ýurduň halkara sport abraýyny ýokarlandyrmaga giňden çekmek» maksady bilen gurnaýandygy bellenilýär.
Ondan öň, Prezidentimiziň karary bilen göreş boýunça dünýä çempionatynyň Guramaçylyk komiteti döredildi.
ORIENT news
