“Google” 2 ýyllap ulanylmadyk köne hasaplary ulanyşdan aýrar
“Google” 2 ýyldan gowrak wagtyň içinde ulanylmadyk köne hasaplary ulanyşdan aýryp başlar. Bu barada kompaniýa ýörite e-mail habarnamasy arkaly ulanyjylara duýdurdy.
Ulanyşdan galan hasaplary aýyrmak işi şu ýylyň 1-nji dekabrynda başlanar. Hasaplarda 2 ýylyň içinde şu işler ýerine ýetirilen bolsa, ol hasap ulanyş ýagdaýynda hasap ediler:
— Elektron hat okalan ýa-da ugradylan bolsa;
— “Google Diskiň” bulut hyzmaty ulanylan bolsa;
— “YouTube-da” wideoşekillere tomaşa edilen bolsa;
— Beýleki ulanyjylara suratly şekillere elýeterlilik berlen bolsa;
— Mobil goşundy ýüklenen bolsa;
— “Google gözleg” hyzmatyndan peýdalanylan bolsa;
— “Google” hasaby arkaly bir hyzmaty ýa-da mobil goşundysyny ulanmaga birigen bolsa.
“Google” uzak wagtyň dowamynda ulanylmadyk hasaby aýyrmazdan ozal, degişli adama “Gmail” elektron poçtasy arkaly birnäçe habarnamalary iberer. Ulanylmaýan hasap aýrylandan soň, ony şol salgy bilen gaýtadan döredip bolmaz.
ORIENT news
