Hapkido boýunça Türkmenistanyň çempionatyna 150-den gowrak türgen gatnaşdy
Paýtagtymyzdaky “Täze Zaman” toplumynda Türkmenistanyň hapkido boýunça çempionaty tamamlandy. Oňa paýtagtymyzdan we ýurdumyzyň welaýatlaryndan 150-den gowrak türgen gatnaşdy diýip, resmi metbugat habar berýär. Ýaryş iki ýaş derejesinde “Hanmudo” söweş sungaty boýunça Milli federasiýasy tarapyndan Halkara hapkido federasiýasynyň düzgünleri boýunça geçirildi.
Bu sport boýunça ýurdumyzyň sport federasiýasynyň başlygy, Türkmenistanyň at gazanan tälimçisi Orif Buharakowyň bellemegine görä, çemionat bu sport görnüşi boýunça ýurdumyzyň halkara ýaryşlarda çykyş etmäge ukyply türgenleri seçip almakdan ybarat boldy. Bu babatda ýaryş ussat türgenleri ýüze çykardy.
Şeýle türgenleriň hatarynda Muhammedaly Parahadow, Jelaletdin Baýjaýew (50-55kg aralygynda), Begenç Serdarow (65 kg-a çenli), Şirmuhammet Homadow (65 kg-dan ýokary), Serdar Oraznepesow (70 kg-a çenli), Bezirgen Jumadurdyýew (75 kg-a çenli), Magamed Nurmämmedow (80 kg-a çenli) görkezmek bolar.
ORIENT news
