Türkmen ýaý atyjy türgenleri halkara ýaryşda 3 medal gazandylar
Ýaý atmak sporty boýunça jemi 10 türgenden ybarat türkmen ýygyndysy Gazagystan Respublikasynyň paýtagty Astanada geçirilen halkara ýaryşda çykyş etdiler. “Gran-pri Astana” ady bilen geçirilen ýaryşda türgenlerimiz jemi 3 medal: 1 altyn, 1 kümüş we 1 bürünç medala eýe boldular.
Türkmenistanyň Bedenterbiýe we sport baradaky döwlet komitetiniň mälim etmegine görä, halkara ýaryşy 13 – 18-nji iýun aralygynda geçirildi.
Aşgabat şäherindäki 27-nji orta mekdebiň okuwçysy Ezizmuhammet Sähedow 21 ýaşa çenli türgenleriň arasynda geçirilen ýaryşda iň ýokary basgançaga – altyn medala eýe boldy. Ikinji orna, ýagny, kümüş medala Türkmenistanyň Milli ýaý atyjylyk federasiýasynyň türgeni Georgiý Agiýarow mynasyp boldy.
21 ýaşa çenli zenan türgenleriň arasynda geçirilen ýaryşda Aşgabat şäherindäki 5-nji sport mekdebiniň tälimçisi Ogulsuraý Kakyşowa bürünç medala mynasyp boldy.
ORIENT news
