Aşgabatda Koreýa Respublikasy hakynda meşhur bäsleşigiň milli tapgyry geçiriler
Koreýa Respublikasynyň Türkmenistandaky ilçihanasy «Koreýa Respublikasy hakyndaky wiktorina» («Quiz on Korea») milli seçip almalary geçirýär. Bu barada diplomatik wekilhananyň saýtynda habar berilýär.
Çäre 15-nji iýunda Döwletmämmet Azady adyndaky Türkmen milli dünýä dilleri institutynda bolar.
Ýokarda ady agzalan ýokary okuw mekdebiniň koreý dili fakultetiniň talyplaryndan ybarat gatnaşyjylar degişli soraglara jogap bermek bilen, özleriniň Koreýa hakyndaky bilimlerini görkezerler. Gatnaşyjylardan diňe biri intellektual wiktorinanyň şu ýylyň sentýabr aýynda Koreýada boljak final tapgyryna gatnaşmaga hukuk gazanar.
«Koreýa Respublikasy hakyndaky wiktorina» — Koreýa Respublikasynyň Daşary işler ministrliginiň halkara jemgyýetçilik diplomatiýasynyň her ýylky maksatnamasynyň we KBS teleýaýlymynyň çäklerinde gurnalýan günorta koreý telewizion şüweleňidir.
Ol gatnaşyjylaryň Koreýa hakyndaky umumy bilimlerini barlaýar. Bu wiktorina koreý ýa-da iňlis dilinde gürleýän daşary ýurt raýatlary hem gatnaşyp bilýärler.
ORIENT habarlar
