Ýewrokomissiýa we BSGG sanly saglygy goraýyş babatynda iri taslama girişýärler
Ýewropa komissiýasy we Bütindünýä saglygy goraýyş guramasy sanly saglygy goraýyş babatynda iri başlangyjy ýerine ýetirmegiň başlanandygyny yglan etdiler – diýip, BSGG-nyň saýtynda habar berilýär.
Hyzmatdaşlyk ilaty işe çekmekligi we bütin dünýäniň raýatlaryny bar bolan we geljekdäki saglyga abanýan howplardan goramaga ýardam etmäge niýetlenen täze global ulgamy döretmegi öz içine alýar.
Ulgam ÝB tarapyndan işlenip düzülen COVID-19 garşy sanjymyň şahadatnamalarynyň sanly mehanizmine esaslanar. Ol BSGG-nyň sanly lukmançylyk sertifikatlaşdyrmasynyň Global torunyň ilkinji elementi bolar we bütindünýä arassaçylyk-epidemiologik howpsuzlygyny pugtalandyrmak maksady bilen, sanly önümleriň giň görnüşleriniň çykarylmagyny göz öňünde tutýar.
«Sanly saglygy goraýyşyň täze önümleri bütin dünýäde adamlara ýokary hilli lukmançylyk hyzmatlaryny tiz we netijeli bermegi üpjün etmek üçin döredilýär» – diýip, BSGG-nyň baş direktory Tedros Gebreýesus beýan etdi.
Öz gezeginde, ÝB-niň saglygy goraýyşyň we azyk önümleriniň howpsuzlygy meseleleri boýunça komissary Stella Kiriakide bu başlangyjyň ÝB-niň we BSGG-nyň ylalaşykly hereketleriniň hem ÝB ýurtlarynda, şeýle hem bütin dünýäde ähli adamlaryň saglygyny üpjün etmäge ýardam edýändiginiň aýdyň mysalydyr diýip, belledi.
Ýewropa Birleşigi tarapyndan COVID-19 pandemiýasyna garşy göreşmekde kabul edilen esasy çäreleriň biri COVID-19 garşy sanjym barada sanly şahadatnamalaryň girizilmegi boldy. Soňlugy bilen bu ulgama ÝB-ne girmeýän döwletler hem birikdiler. ÝB bilen hyzmatdaşlygynyň çäklerinde BSGG dünýäniň ýurtlaryna ikitaraplaýyn gabat gelýän sanly şahadatnamalardan peýdalanmaga rugsat edip, bu prosessi bütindünýä derejesinde utgaşdyrar.
ORIENT habarlar
