Tbiliside Türkmenistanyň we Gruziýanyň ulag we energetika infrastrukturasyny ösdürmek boýunça taslamalar ara alnyp maslahatlaşyldy
Duşenbe güni Tbiliside Ykdysady hyzmatdaşlyk boýunça hökümetara türkmen- gruzin toparynyň ýolbaşçylarynyň duşuşygy geçirildi. Taraplar ikitaraplaýyn gatnaşyklaryň ýokary derejede alnyp barylýandygyny belläp geçdiler, şeýle-de iki ýurduň arasyndaky köpmaksatlaýyn hyzmatdaşlygy mundan beýläk-de ösdürmegiň ugurlary kesgitlenildi – diýlip, türkmen daşary syýasat edarasynyň saýtynda habar berilýär.
Toparyň türkmen böleginiň başlygy Türkmenistanyň Söwda we daşary ykdysady aragatnaşyklar ministri Begenç Goçmollaýew we toparyň gruzin bölegine başlyklyk edýän Gruziýanyň wise-premýeri, Ykdysadyýet we durnukly ösüş ministri Lewan Dawitaşwili söwda-ykdysady gatnaşyklary, maýa goýum hyzmatdaşlygyny giňeltmek, ulag-logistika we energetika infrastrukturasyny ösdürmek üçin bilelikdäki taslamalary durmuşa geçirmek boýunça meseleleri ara alyp maslahatlaşdylar.
Şeýle hem, taraplar ylym, bilim, sport we syýahatçylyk ugurlarynda mundan beýläkki amaly hyzmatdaşlygyň zerurlygyna üns çekdiler.
2023-nji ýylyň 5-6-njy iýunynda Tbilisi şäherinde Ykdysady hyzmatdaşlyk boýunça hökümetara türkmen-gruzin toparynyň dördünji mejlisiniň geçirilýändigini ýatlatmak isleýäris.
ORIENT news
