Türkmen wekiliýeti GDA-da ulag infrastrukturasyny ösdürmegiň meselelerini ara alyp maslahatlaşdy
Türkmenistan Moskwada Russiýanyň ulag uniwersitetiniň esasynda geçen GDA agza-döwletleriň Utgaşdyryjy ulag maslahatynyň pudak geňeşleriniň 13-nji sessiýasyna wekilçilik etdi. Bu barada Arkalaşygyň metbugat gullugy habar berýär.
Çärä şeýle hem Ermenistanyň, Belarusyň, Gazagystanyň, Gyrgyzystanyň, Täjigistanyň, Russiýanyň we Özbegistanyň wekilleri gatnaşdylar.
Taraplar döwletleriň ulag toplumlarynyň hyzmatdaşlyk meselelerini, ulagyň hereket etmeginiň howpsuzlygyny ýokarlandyrylmagynyň, şeýle hem ulag infrastrukturasynyň ösdürilmeginiň meselelerini ara alyp maslahatlaşdylar.
Sessiýa Utgaşdyryjy ulag maslahatynyň alty pudaklaýyn geňeşleriniň aýry-aýrylykdaky mejlislerini öz içine aldy. Hususan-da: Awtoulag we şäher ýolagçy ulagynyň geňeşiniň duşuşygy; Deňiz we içerki suw ulagy geňeşi; Ulagda howpsuzlyk geňeşi; Bilim we ylym boýunça geňeş; Ulagda informatizasiýa boýunça geňeş we GDA-nyň halkara ulag geçelgeleri boýunça geňeşi.
GDA-nyň UUM-niň pudak geňeşleriniň 13-nji sessiýasynyň netijeleri GDA-nyň UUM-nyň 2023-nji ýylyň sentýabrynda boljak nobatdaky mejlisiniň garalmagyna çykarylar.
ORIENT habarlar
