Aşgabatda rus filmleri we animasiýa hepdeligi geçiriler
9-njy iýunda paýtagtyň «Aşgabat» kinoteatrynda rus kinosy we animasiýa hepdeliginiň dabaraly açylyşy bolar. Bu barada ORIENT-iň habarçysyna Russiýa Federasiýasynyň Türkmenistandaky ilçihanasynyň birinji sekretary Ýuliýa Zaýtsewa aýtdy.
Alty günüň dowamynda paýtagtyň ýaşaýjylary we myhmanlary «Aşgabat» we «Berkarar» kinoteatrlarynda rus kinorežisýorlarynyň täze işlerine, şeýle hem iň gowy animasiýa filmlerine tomaşa etmäge mümkinçilik alarlar.
— «Çeburaşka», «Gözbagçylar» we şuňa meňzeş, ýagny ýaňy-ýakynda çykan filmler görkeziler, - diýip Russiýa Federasiýasynyň Aşgabatdaky ilçihanasynyň birinji sekretary Ýuliýa Zaýtsewa ORIENT-iň habarçysyna gürrüň berdi. – Ondan başga-da 12-nji iýunda Russiýanyň güni mynasybetli «Aşgabat» kinoteatrynda diňe bir klassiki filmiň görkezilişini däl, eýsem çagalary we ululary hem gyzyklandyrjak interaktiw maksatnamalary öz içine alýan uly çäräni gurnamagy meýilleşdirýäris.
Russiýa Federasiýasynyň Türkmenistandaky ilçihanasy we ýurdumyzyň Medeniýet ministrligi tarapyndan gurnalan rus kino we animasiýa hepdeligi 14-nji iýuna çenli dowam eder.
Şeýle hem 11-nji iýunda Russiýa gününe bagyşlanan uly konsert geçirmek meýilleşdirilýär.
Artur PETROSÝANS
