BMG-nyň Nýu-Ýorkdaky baş edarasynda Bütindünýä welosiped güni bellenildi
Bütindünýä welosiped gününi bellemek 2-nji iýunda BMG-nyň Nýu-Ýorkdaky baş edarasynda geçirildi. Bu çäre, Bahreýniň, Ekwador, Hindistan, Indoneziýa, Latwiýa, Lihtenşteýn, Polşa we Rumyniýanyň hemişelik wekilhanalary bilen bilelikde BMG-de Türkmenistanyň hemişelik wekilhanasy tarapyndan gurnaldy.
Çärä BMG-nyň Baş Assambleýasynyň 77-nji mejlisiniň başlygy Çaba Kýorýoşi, Ählumumy aragatnaşyk boýunça baş sekretaryň kömekçisiniň orunbasary Melissa Fleming, Nýu-Ýorkdaky BMG-nyň işgärler birleşiginiň başlygy Aýtor Arauz, agza döwletleriň BMG-daky hemişelik wekilleri we BMG-nyň sekretariatynyň işgärleri gatnaşdy diýlip, türkmen hemişelik missiýasynyň sahypasynda habar berilýar.
Türkmenistanyň BMG-däki hemişelik wekili Aksoltan Ataýewa açylyşda eden çykyşynda çärä gatnaşyjylara minnetdarlyk bildirdi we BMG-nyň Baş Assambleýasynyň 2018-nji ýylyň 12-nji aprelindäki «Bütindünýä welosiped güni» rezolýusiýasynyň başyny başlaýjy hökmünde Türkmenistanyň welosiped sürmegini wagyz edýän hökümetleriň, guramalaryň we şahsyýetleriň bu tagallalaryna ýokary baha berýändigini aýtdy.
Ilçi Ataýewa ÝUNESKO-nyň Ýerine ýetiriji geňeşiniň öňräkki «Welosiped hemmeler üçin» kararynyň DÖM-nyň gazananlarynda, esasanam saglyk, bilim, gender deňligi we daşky gurşawy goramak ýaly ugurlarda welosipedleriň möhüm orun tutýandygyny belledi.
BMG-nyň Baş Assambleýasynyň 77-nji mejlisiniň başlygy Çaba Kýorýoşi we Ählumumy aragatnaşyk boýunça baş sekretaryň kömekçisiniň orunbasary Melissa Fleming, bu çärä agza ýurtlary diňe bir fiziki we akyl saglygyny gowulaşdyrmak üçin däl-de, eýsem jemgyýetde welosiped sürmek medeniýetini emele getirmek üçin welosipedlere üns bermäge çagyrdy. Ýagny, ýol howpsuzlygyny ýokarlandyrmak, hususan-da, pyýadalaryň we welosiped sürmek howpsuzlygyny goramak we gowulandyrmak, şeýle hem BMG-nyň Baş Assambleýasynyň Türkmenistanyň başlangyjy bilen kabul eden «Durnukly ösüş üçin jemgyýetçilik ulag ulgamynda welosipediň köpçülikleýin ulanylmagyny girizmek» rezolýusiýasyna laýyklykda, welosiped sürmegi halkara, sebit, milli we milletara ösüş maksatnamalaryna goşmak üçin syýasaty we çäreleri durmuşa geçirmäge çagyrdy.
Şeýle hem olar, welosipedleriň dünýäde meşhurlygynyň soňky döwürde has işjeňleşendigini bellediler. Welosiped zolaklary we şuňa meňzeş infrastruktura bölünip berilýär, welosiped üçin goralýan duralgalar gurulýar we welosiped kärendesi ulgamy ösdürilýär. Şeýle syýasat şäher merkezlerini awtoulaglardan azaltmaga we daşky gurşawyň ýagdaýyny gowulaşdyrmaga kömek edýär.
Resmi dabaranyň ahyrynda welosiped sürüşlik geçirildi.
ORIENT news
