Rus diliniň güni Aşgabatda baýramçylyk çäreleri bilen belleniler
Rus diliniň güni we beýik rus şahyry A.S.Puşkiniň doglan güni mynasybetli baýramçylyk çäresi 4-nji iýunda paýtagtyň "Aşgabat" seýilgähinde geçiriler.
Aşgabat şäheriniň ýaşaýjylarynyň we paýtagtyň myhmanlarynyň söýgüli dynç alyş künjegine öwrülen bu ýerde irden (10:00) tematiki ussatlyk sapaklary başlar, A.S.Puşkiniň "Altyn balyk" ertekisine esaslanýan interaktiw sahnalaşdyrma guralar, şeýle hem rus şahyrynyň eserleri boýunça gyzykly bäsleşikler we sorag-jogaplar geçiriler.
Çäräni guraýjy - Russiýa Federasiýasynyň Türkmenistandaky ilçihanasynyň Bilim, ylym we medeniýet bölümi hemmeleri baýramçylyk çäresine gatnaşmaga çagyrýar. Metbugat habarnamasyna görä, işjeň gatnaşan myhmanlar baýraklara mynasyp bolarlar. Rus diliniň halkara güni BMG-niň karary bilen her ýyl 6-njy iýunda - beýik rus şahyry, häzirki zaman rus edebi dilini esaslandyryjy Aleksandr Sergeýewiç Puşkiniň doglan gününde bellenilýär. Rus dili iňlis, arap, ispan, hytaý we fransuz dilleri bilen birlikde BMG-nyň alty resmi diliniň biridir. Halkara guramalardaky statusy boýunça rus dili iňlis, fransuz we ispan dillerinden soň dördünji orunda durýar we 15 iri halkara guramanyň resmi ýa-da iş dili hasaplanýar, bular ilkinji nobatda BMG we onuň düzüm guramalarydyr (BSGG, UNESKO, IAEA, FAO, UNIDO we ş.m.) .
Rus dilinde gürleýänleriň sany boýunça ol iňlis, hytaý, hindi, ispan, arap, bengali we fransuz dilinden soň dünýäde sekizinji orunda durýar (258 million adam). 12 dünýä dili üçin global bäsdeşlik ukyby indeksi (GK-Index) boýunça rus dili bäşinji ýeri eýeleýär (2.86).
ORIENT news
