Owgan howa ýollary Kabuldan Hytaýa ýolagçy gatnawlaryny dikeldýär
Hytaýyň demirgazyk-günbataryndaky Sinsýan uýgur awtonom sebitiniň paýtagty Urumçi bilen Owganystanyň paýtagty Kabulyň arasynda yzygiderli uçuşlar dikeldildi.
Bu ugur hepdede bir gezek çarşenbe güni ýerine ýetiriler we uçar şol gün Kabula gaýdyp geler. Häzirki wagtda Owganystanyň Ariana howa ýollary iki ýurduň arasynda göni ýolagçy gatnawlarynyň ýeke-täk operatorydyr diýip, Sinhua agentligi habar berýär.
Uçuşlaryň täzeden başlamagy «Guşaklar we ýollar» ugrundaky şäherleriň arasyndaky aragatnaşygy hasam ösdürer we Sinsýan bilen Kabulyň arasynda ykdysadyýet, söwda, medeniýet we beýleki ugurlar boýunça hyzmatdaşlygy we alyş-çalyşlary ösdürer diýip, Urumçiniň Diwopu halkara howa menziliniň habarynda aýdylýar.
Awiasiýa häkimiýetiniň habar bermegine görä, halkara uçuşlaryň dikeldilmegi bilen Urumçiden Merkezi we Günbatar Aziýa hem-de Ýewropa gidýän uçuşlaryň sany artar.
ORIENT news
