Russiýada Gagarin ordeni döredildi
Russiýanyň Prezidenti Wladimir Putin täze döwlet baýragyny - Gagarin ordenini hödürledi. Döwlet baştutanynyň degişli permany şenbe güni çap edildi – diýip, TASS habar berýär.
Resminamadan görnüşi ýaly, orden kosmonawtikadaky üstünlikleri üçin, mysal üçin, kosmos gämileriniň üstünlikli uçurylmagy üçin gowşurylyp bilner. Şeýle hem bu baýrak, alymlary, inženerleri we beýleki hünärmenleri taýýarlamakda, raketa we kosmos tehnologiýasyny ösdürmekde, öndürmekde, synag etmekde we kynçylyksyz işletmekde, täze tehnologiýalary döretmekde we durmuşa ornaşdyrmakda gazanylan üstünlikler üçin berler.
Bu baýraga diňe bir Russiýanyň raýatlary däl, eýsem "älem giişligini ylmy taýdan öwrenmek we peýdalanmak pudagynda Russiýa Federasiýasy bilen halkara hyzmatdaşlyga netijeli gatnaşandygy üçin" daşary ýurtlular hem mynasyp bolup biler. Şeýle hem, bu dereje kosmos işlerinde ýeten uly üstünlikleri üçin edara-kärhanalaryň zähmet toparlaryny orden bilen sylaglamaga mümkinçilik berýär.
ORIENT news
