Türkmen hukuk goraýjylary BMG-niň ugurdaş komissiýasynyň sessiýasynyň çäklerinde tejribe alyşdylar
Türkmenistanyň Awstriýadaky ilçihanasy BMG-niň Neşeler we Jenaýaçylyk baradaky Müdirliginiň Merkezi Aziýa boýunça Sebitleýin edarasy bilen bilelikde BMG-niň jenaýatçylygyň öňüni almak wejenaýat adalaty boýunça Wenada bolan 32-nji komissiýasynyň çäklerinde «Jenaýatçylygyň öňüni almak boýunça işlerde ikitaraplaýyn dialogyň we köptaraplaýyn resminamalaryň ähmiýeti» atly ugurdaş çäräni gurady.
Türkmen tarapyna ýurduň Baş prokuraturasynyň we Içeri işler ministrliginiň işgärleri wekilçilik etdiler. Çärä şeýle hem BMG-niň neşeler we jenaýatçylyk baradaky müdirliginiň, BMG-niň Merkezi Aziýa üçin öňüni alyş diplomatiýasynyň Sebitleýin merkeziniň, BMG-niň transmilli guramaçylykly jenaýatçylyga garşy göreşmek boýunça Köptaraply ylalaşygynyň syn mehanizminiň sekretariatynyň wekilleri gatnaşdylar.
Duşuşykda çykyş etmek bilen, Türkmenistanyň Baş prokuraturasynyň we Içeri işler ministrliginiň wekilleri ýurduň bu ugurda alyp barýan öňüni alyş çäreleri hakynda gürrüň berdiler. Şunuň bilen baglylykda, olar halkara hyzmatdaşlygyny işjeňleşdirmegiň möhümdigini bellediler.
Transmilli guramaçylykly jenaýatçylygyň dürli görnüşlerine garşy göreş babatynda pikir, tejribe alşyldy, gazanylan üstünlikler paýlaşyldy, şeýle hem bilelikdäki tagallalar arkaly çözülmeli mundan beýläkki wezipeler bellenildi.
ORIENT habarlar
