Siriýa, Uganda we Burkina-Faso Türkmenistanyň Bitaraplygyň dostlary toparyna agza boldular
Türkmenistanyň başlangyjy bilen parahatçylygyň, howpsuzlygyň we durnukly ösüşiň hatyrasyna döredilen Bitaraplygyň dostlary toparyna üç sany täze agza ýurt — Burkina-Faso, Siriýa Arap Respublikasy we Uganda goşuldy. "Agzalaryň sanynyň artmagy bitaraplyk ýörelgeleriniň has giňden ulanylmagy esasynda Toparyň ählumumy parahatçylyga, howpsuzlyga we durnukly ösüş maksatlaryna bolan ygrarlylygyny güýçlendirer” – diýlip, Türkmenistanyň BMG-niň ýanyndaky diplomatik wekilhanasynyň internet sahypasynda ýerleşdirilen habarda bellenilýär.
Parahatçylygyň, howpsuzlygyň we durnukly ösüşiň hatyrasyna döredilen Bitaraplygyň dostlary topary ähliumumy parahatçylyga we howpsuzlyga ýetmekde bitaraplyk ýörelgelerini wagyz etmäge gönükdirilen resmi däl halkara platformadyr. Topar bitaraplygyň möhümdigini ykrar etmek bilen, döwletara gepleşikleriň ýola goýulmagyna, ynamy güýçlendirmäge, halklaryň arasyndaky hyzmatdaşlygy we özara düşünişmegi ösdürmäge çalyşýar.
Täze agzalar gymmatly bilimlerini we tejribelerini Toparyň işine goşant ederler we hemmeler üçin howpsuz hem-de durnukly geljegi gurmak üçin, bitaraplyk syýasatynyň mümkinçiliklerini ulanmaga ýardam bererler.
Türkmenistan halkara derejesinde, esasanam BMG-niň çäginde öz syýasatlarynda bitaraplyk ýörelgelerini ulanýan ýurtlaryň parahatçylygy goraýyş we dörediji potensialyny amaly taýdan ulanmak meseleleri boýunça yzygiderli gepleşikleri ösdürmäge ýardam bermek üçin Dostlar toparyny döretdi. Häzirki wagtda bu topara 25 ýurt goşuldy.
ORIENT news
