Aşgabatda serhetaşa jenaýatlar boýunça derňewçiler üçin okuw geçirildi
Aşgabatda 22-nji maýdan 24-nji maý aralygynda serhetaşa jenaýatlar boýunça derňewçiler üçin seminar geçirildi. Bu okuw Merkezi Aziýada Serhet dolandyryşyna ýardam maksatnamasy (BOMCA 10) tarapyndan gurnaldy we BOMCA 10 tarapyndan Merkezi Aziýada geçirilen bäşinji seminar boldy. Şuňa meňzeş çäreler öň Gazagystanda, Gyrgyzystanda, Täjigistanda we Özbegistanda geçirilipdi.
Gatnaşanlar Ýewropa Bileleşiginiň çemeleşmesi we adam söwdasy hem-de bosgunlaryň bikanun getirilmegi ýaly serhetaşa guramaçylykly jenaýatlary derňemegiň täze usullary bilen tanyşdylar.
Bu seminaryň dowamynda jenaýat aňtaw gullugynyň işgärleri we milli howpsuzlyk, içerki işler, prokuratura, migrasiýa we serhet gullugy derňewçileri serhetaşa jenaýatlar baradaky bilimlerini kämilleşdirdiler.
Şeýle hem, BMG bilen ÝB-niň adam söwdasyna we migrantlaryň bikanun getirilmegine garşy göreşmek üçin kanuny resminamalary, guramaçylykly serhetaşa jenaýatlary derňemegiň täze usullary, adam söwdasynyň pidalaryny kesgitlemek usullary hem göz öňünde tutuldy.
Baş prokuraturanyň we Litwanyň Içeri işler ministrliginiň we UNODC Merkezi Aziýa sebit bölüminiň hünärmenleri kazyýet işlerini hödürlediler hem-de derňewiň dürli taraplary bilen baglanyşykly ara alyp maslahatlaşdylar.
Bu gepleşikleriň netijesinde, bosgunlary kanuna garşy getirmek we adam söwdasy boýunça tälimçiler okuw gollanmasynyň işlenip düzülmegine garaşylýar diýip, BOMCA 10 metbugat beýanatynda habar berilýär.
BOMCA Ýewropa Bileleşigi tarapyndan maliýeleşdirilýär we ÝB hyzmatdaşlary konsorsiumy we Halkara Migrasiýa Syýasatyny Ösdüriş Merkezi tarapyndan amala aşyrylýar. Maksatnamanyň esasy maksady, serhetleri toplumlaýyn dolandyrmakda durnukly ykdysady ösüşi öňe sürmek arkaly sebitde howpsuzlygy we durnuklylygy ýokarlandyrmakdyr.
ORIENT news
