Rumyniýada Türkmenistanyň Medeniýet günleri açyldy
Buharestde Türkmenistanyň Medeniýet günleri açyldy, ony geçirmek üçin düzüminde medeniýet ministrliginiň we onuň pudaklaýyn edaralarynyň wekillerinden, şeýle hem sungat ussatlaryndan, meşhur aýdym-saz toparlaryndan ybarat bolan uly türkmen wekiliýeti Rumyniýa geldi.
Döredijilik çäresiniň gurnaýjylary bolup Türkmenistanyň Medeniýet ministrligi we Rumyniýanyň Medeniýet ministrligi, şeýle hem Türkmenistanyň Rumyniýadaky ilçihanasy çykyş etdiler.
Buharestde we Konstansda geçjek Medeniýet günleriniň maksatnamasynda — halkara maslahaty, sergi, poeziýa agşamy, Oguzhan adyndaky «Türkmenfilm» birleşiginiň Magtymgulynyň ömrüne we döredijiligine bagyşlanan «Istärin» kinolentasynyň görkezilişi bar.
Rumyniýanyň ýaşaýjylary şeýle hem milli amaly-haşam we çeperçilik sungaty bilen, özboluşly türkmen aşhanasy bilen we däp bolup gelýän lybaslar, türkmen halkynyň aýdym-saz döredijiligi bilen tanşarlar.
Bu döredijilik çäresi nusgawy şahyr we meşhur akyldar Magtymguly Pyragynyň doglan gününiň 300 ýyllygyny baýram etmäge bagyşlanan çäreleriň çäklerinde geçirilýär.
ORIENT habarlar
