Dubaý emeli intellekti dyknyşyklary kemeltmek üçin ulanmagy meýilleşdirýär
Dubaý emeli intellekt tehnologiýasyny (EI) ulag akymyny seljermek we ýollarda döreýän dyknyşyklary azaltmak üçin ulanar.
BAE-de Ýol we ulag müdirligi (Roads and Transport Authority RTA) dünýäniň öňdebaryjy kompaniýalary bilen hyzmatdaşlykda ýollara we köprülere öňüni alyş hyzmatlaryny etmek, Jemgyýetçilik ulagynyň ugurlaryny meýilleşdirmek, adamlaryň köp ýygnanmagyny dolandyrmak we ş.m. babatynda toplumlaýyn korporatiw platforma badalga berdi.
Müdirlige degişli maglumatlary işlemek bilen, platforma emeli intellekt babatynda birnäçe taslamalary ýerine ýetirmek üçin esas bolup durýar. Ol müşderilere we işgärlere hyzmat etmegiň hilini ýokarlandyrmak, şeýle hem dolandyryş ýumuşlarynyň işlenilmegini tizleşdirmek boýunça EI-i ulanmagyň 100-den gowrak wariantyny gurşap alýar.
BAE-niň Ýol we ulag müdirliginiň baş direktory, ýerine ýetiriji direktorlarynyň geňeşiniň başlygy Mattar Al Taýer bu platforma badalga berilmeginiň Müdirligiň Dubaýy dünýädäki iň akylly şähere öwürmäge ýardam etmäge ymtylyşyny tassyklaýar – diýip, beýan etdi.
ORIENT habarlar
