Ynsanperwer çäräniň çäklerinde Türkmenistandan baran lukmanlar Owganystanda işe girişdiler
Ynsanperwer kömeginiň çäklerinde Türkmenistandan üç lukman Owganystanyň Turgundy şäherçesine geldiler - diýip, ýurduň daşary syýasat edarasynyň saýty habar berýär.
Türkmen hünärmenleri Türkmenistan tarapyndan 2016-njy ýylda gurlan çaga dogrulýan hassahanadaky owgan zenanlaryna we çagalaryna bejeriş-maslahat beriş goldawyny bererler.
Owgan tarapy türkmen lukmanlaryny mähirli garşylady, olar maý aýynyň ahyryna çenli Owganystanda bolarlar.
Ozal 3-nji maýda Türkmenistanyň Owganystandaky baş konsullygy (Hyrat şäheri) çaga dogrulýan hassahanadaky düýpli abatlaýyş işlerini tamamlady, şeýle hem onuň işgärlerine gerekli derman serişdeleri we lukmançylyk ähmiýetli zatlary gowşurdy.
«Türkmenistan goňşyçylygyň däplerine esaslanyp, goňşy Owganystana kömek etmegini dowam etdirýär. Bu öz gezeginde, türkmen we owgan halklarynyň arasynda däp bolup gelýän dostluk, doganlyk we hoşniýetli goňşyçylyk gatnaşyklarynyň mundan beýläk ösmegine hyzmat edýär» - diýip, Türkmenistanyň DIM-niň saýtynda bellenilýär.
ORIENT habarlar
