Türkmenistanyň Oba hojalyk we daşky gurşawy goramak ministrligi ESKATO-nyň 79-njy sessiýasynda howanyň üýtgemeginiň ara alyp maslahatlaşmalaryna gatnaşýar
Oba hojalygy we daşky gurşawy goramak ministriniň orunbasary Begmyrat Ataýewiň baştutanlygyndaky türkmen wekiliýeti Aziýa we Ýuwaş ummany üçin Ykdysady we sosial komissiýanyň 79-njy sessiýasynyň çäklerinde howanyň üýtgemeginiň meseleleriniň maslahatlaşylmagyna gatnaşýar.
Çäre 15-nji maýda BMG-niň Bankokdaky (Tailand) maslahatlar-merkezinde başlandy.
Sessiýanyň temasy — «Aziýa-Ýuwaş ummany sebitinde durnukly ösüş maksatlary üçin howa hereketleriniň tizleşdirilmegi». Duşuşygyň esasy maksady döwletleriň arasynda eko-syýasat babatynda sebitleýin hyzmatdaşlygy pugtalandyrmakdyr – diýip, Türkmenistanyň Malaýziýadaky ilçihanasy habar berýär.
ESKATO-nyň esasy maksatlarynyň arasynda sebitiň ýurtlarynyň arasynda sosial-ykdysady we medeni-ynsanperwer hyzmatdaşlygy ösdürmekden başga-da, daşky gurşawy goramak boýunça bilelikdäki tagallalary utgaşdyrmak üçin konstruktiw özara gatnaşyklary ýola goýmakdyr.
ORIENT habarlar
