Saýlawlaryň ikinji tapgyrynyň çäklerinde Türkiýäniň prezidentligine dalaşgärleriň saýlawlaryň öňündäki wagyz işleri başlandy
Türkiýäniň prezidentligine dalaşgärleriň saýlawlarynyň öňüsyrasynda ikinji tapgyryň çäklerindäki wagyz işleri başlandy – diýip, Anadolu maglumatlar agentligi habar berýär. Ses bermekligiň birinji tapgyrynyň netijeleri boýunça dalaşgärleriň hiç biriniň birinji tapgyrdaky ýeňiş üçin sesleriň 50% alyp bilmändigi sebäpli, saýlawlaryň ikini tapgyry bellendi.
Saýlaw prosessi Ýokary saýlaw topary tarapyndan taýýarlanylan senenama boýunça dowam eder. Ählumumy ses bermegiň nobatdaky tapgyry 28-nji maýda bolar.
Ikinji tapgyra häzirki prezident we Adalat we ösüş partiýasynyň baştutany Rejep Taýyp Ärdogan we oppozisiýanyň wekili Respublikan halk partiýasynyň baştutany Kemal Kylyçdaroglu gatnaşarlar.
Ikinji tapgyrda daşary ýurtlarda we gümrük nokatlarynda ses bermek 20-nji maýdan 24-nji maýa çenli geçer. Ýokary saýlaw topary tarapyndan gutarnykly netijeleriň 1-nji iýunda aýan edilmegine garaşylýar.
ORIENT habarlar
