Aşgabatda Türkmenistan bilen ÝUNESKO-nyň arasyndaky hyzmatdaşlyk ara alnyp maslahatlaşyldy
Aşgabatda Türkmenistanyň Birleşen Milletler Guramasynyň bilim, ylym we medeniýet meseleleri boýunça ýöriteleşdirilen edarasy – ÝUNESKO agza bolmagynyň 30 ýyllygyna bagyşlanan halkara konferensiýasynyň geçirilmegi Türkmenistanyň Daşary işler ministriniň orunbasary Mähri Bäşimowa we ÝUNESKO-nyň klaster edarasynyň direktory Golda El- Huri tarapyndan ara alnyp maslahatlaşyldy. Duşuşyk, duşenbe güni Türkmenistanyň Daşary işler ministrliginde geçirildi diýip, Türkmen Daşary işler ministrliginiň saýty habar berýär.
Gepleşiklere gatnaşyjylar Türkmenistan bilen ÝUNESKO-nyň arasyndaky hyzmatdaşlygyň geljegine ünsi çekdiler we taraplaryň konstruktiw hyzmatdaşlygynyň Türkmenistan tarapyndan tassyklanan ÝUNESKO konwensiýalarynda gazanylan oňyn netijelere, şeýle hem taraplaryň arasynda gol çekilen beýleki halkara hukuk resminamalaryna esaslanýandygyny bellediler.
Gatnaşyklary has-da pugtalandyrmak üçin ýurdumyzyň iki sany ýokary bilim mekdeplerinde – Magtymguly adyndaky Türkmen döwlet uniwersitetinde we Seýdi adyndaky Türkmen döwlet mugallymçylyk institutynda, işleri Türkmenistanyň Gurama bilen gatnaşygyny çuňlaşdyrmaga gönükdirilen, ÝUNESKO-nyň bölümlerini açmagyň ähmiýeti bellenildi.
Golda El-Huri, köpmilletli nominasiýalary: «Halkara Nowruz baýramy», «Türkmen keşdeçilik sungaty», «Ýüpekçilik we dokmaçylyk üçin adaty ýüpek önümçiligi», «Hoja Nasreddiniň hekaýalaryny» ÝUNESKO-nyň maddy däl medeni mirasynyň sanawyna girizmegi teklip etmek, taýýarlamak we girizmek boýunça alyp barýan işlerine ýokary baha berdi.
Dürli ýyllarda Türkmenistanyň birnäçe medeni we taryhy ýadygärlikleri – 1999-njy ýylda – Gadymy Merw, 2005-nji ýylda – gadymy Türkmen şäheri Köneürgenç, 2007-nji ýylda – Parfiýanyň Nisa galasynyň harabalyklary, ÝUNESKO-nyň Bütindünýä mirasynyň sanawyna girizildi.
ORIENT news
