Hytaý ilkinji gezek awtoulaglary eksport etmek boýunça dünýäde birinji orna çykdy
Hytaý ilkinji gezek bu görkeziji boýunça Ýaponiýadan we Germaniýadan öňe geçip, dünýäde iri awtoulag eksport ediji ýurt boldy. 2023-nji ýylyň birinji çärýeginde Hytaý jemi 1,069 mln awtoulag, Ýaponiýa bolsa —1, 047 mln awtoulag eksport etdi.
Hytaýda awtoulaglary iri eksport edijileriň arasynda — Tesla China, SAIC, Chery, Geely, Great Wall Motors, Changan we BYD bar.
Awtoulag öndürijileriň Hytaý birleşmesiniň maglumatyna görä, aprelde awtoulaglaryň eksportynyň aýlyk möçberi 376 müňe ýetdi. Bu geçen aý bilen deňeşdireniňde 3,3% köpdür we ýyllyk görkezijiniň 170% artandygyny görkezýär.
Çaklamalara görä, şu ýylyň ahyryna çenli Hytaýdan eksport edilýän awtoulaglaryň sany 4 milliondan geçer. Şu alnan ugur saklanyp galanda, Hytaý Ýaponiýadan öňe geçmek bilen, 2023-nji ýylda dünýäde iri awtoulag eksport ediji ýurt bolmak ähtimallygy bardyr.
2020-nji ýyla çenli Hytaýdan her ýylda eksport edilýän awtoulaglaryň sany ýylda 1 million bolup, takmynan 10 ýylyň dowamynda bu şeýle bolmagynda saklandy. 2021-nji ýylda Hytaýyň awtoulag eksporty 2 milliondan gowraga çenli artdy. 2022-nji ýylda täze ýokary derejä ýetilip, ol 3,11 mln awtoulag boldy.
ORIENT habarlar
