Türkmenistanyň ilçisi Batyr Nyýazlyýew Russiýanyň DIM-niň baştutany Sergeý Lawrow bilen duşuşdy
Moskwada Türkmenistanyň RF-daky ilçisi Batyr Nyýazlyýewiň Russiýanyň daşary işler ministri Sergeý Lawrow bilen duşuşygy boldy, onuň barşynda türkmen tarapyna RF-nyň Türkmenistanda täze bellenen ilçisi Iwan Wolynkin bilen tanyşdyryldy.
Lawrow Iwan Wolynkiniň RF-nyň Türkmenistandaky ilçisi hökmünde alyp barjak işiniň ýurtlaryň arasyndaky strategiki gatnaşyklaryň ösüşine täze oňyn itergi berjekdigine ynam bildirdi.
Nyýazlyýew kärdeşini wezipä bellenmegi bilen gutlady we diplomatik gullugyň täze ýerinde üstünlikleri arzuw etdi – diýip, Russiýadaky türkmen diplomatik wekilhanasy [habar berýär] (https://russia.tmembassy.gov.tm/ru/news/115220).
Diplomatlar ikitaraplaýyn esasdaky, şeýle hem halkara guramalaryň çäklerindäki türkmen-rus hyzmatdaşlygynyň mundan beýläkki ösüşiniň meselelerini ara alyp maslahatlaşdylar.
Russiýanyň prezidenti Wladimir Putin apreliň başynda Aleksandr Blohini wezipesinden boşadyp, Iwan Wolynkini Russiýanyň Türkmenistandaky ilçisi edip belledi.
Wolynkin 1959-njy ýylda Moskwada doguldy. 1981-nji ýylda SSSR-iň DIM-niň Moskwanyň döwlet halkara gatnaşyklary institutyny tamamlady (häzirki Russiýanyň DIM-niň MGIMO-sy) we RF-nyň Ýugoslawiýadaky, ABŞ-daky, Gruziýadaky, Makedoniýadaky we Ermenistandaky ilçihanalarynda işledi.
ORIENT habarlar
