Türkmenistanda Falling Walls Lab bäsleşiginiň ilkinji ýeňijileri belli boldy
Türkmenistanda ýurtda ilkinji gezek geçirilen Falling Walls Lab halkara platformanyň innowasion taslamalarynyň bäsleşiginiň ýeňijileri belli boldy.
Bäsleşigiň eminleriniň biragyzdan kabul eden karary bilen S. Seýdi adyndaky Türkmen döwlet mugallymçylyk institutynyň uçurymy Eziz Artykow ýeňiji boldy, güýzde oňa bäsleşigiň halkara tapgyryna gatnaşmak üçin Berline syýahat garaşýar.
Ikinji ýere M. Garryýew adyndaky Türkmenistanyň döwlet lukmançylyk uniwersitetiniň talyby Selbi Jumageldiýewa, üçünji ýere bolsa Türkmenistanyň DIM-niň Halkara gatnaşyklary institutynyň talyby Arslankerim Kerimow mynasyp boldular.
Dürli ugurlar boýunça, şol sanda ulag we logistika, energetika, lukmançylyk, psihologiýa hem-de beýleki ugurlardaky innowasion pikirlerini we taslamalaryny jemi 12 sany gatnaşyjy hödürledi.
Falling Walls Lab ýaş alymlara we hünärmenlere özleriniň pikirlerini, ylmy-barlag taslamalaryny we başlangyçlaryny Germaniýanyň akademiki alyşma gullugy — DAAD tarapyndan goldanylmagynda bütin dünýä görkezmäge ajaýyp mümkinçilik berýär.
Üç minudyň dowamynda bäsleşige gatnaşyjylar öz pikirlerini islendik ylmy, jemgyýetçilik, önümçilik ýa-da işewürlik pudagynda hödürlemelidirler. Esasy zat — konsepsiýanyň täzeçil we batyrgaý bolmagydyr.
ORIENT habarlar
