ÝB-niň Türkmenistandaky wekilhanasy Balkanabatda «Näme? Nirede? Haçan?» ýaryşyny gurady
Ýagşygeldi Kakaýew adyndaky Halkara nebit we gaz uniwersitetiniň Balkanabatdaky şahamçasynda «Näme? Nirede? Haçan?» oýnunyň sport wersiýasynyň ýaryşy boldy. Ony Ýewropa Birleşiginiň Türkmenistandaky wekilhanasynyň birinji maslahatçysy Renata Wrubeliň deňizýaka sebitine saparynyň çäklerinde Türkmenistan bilen ÝB-niň arasyndaky diplomatik gatnaşyklaryň ýola goýulmagynyň 30 ýyllygy mynasybetli guradylar.
«ÝB tarapyndan maliýeleşdirilýän ähli başlangyçlaryň institutlary pugtalandyrmaga we adamlaryň mümkinçiliklerini ösdürmäge gönükdirilen bolmagy wajypdyr. Biz bu gün bu ýere ýaşlary, bilimi we ÝB bilen Türkmenistanyň arasyndaky ikitaraplaýyn gatnaşyklary bellemek üçin ýygnandyk. Muny ýaşlar bilen etmegiň iň gowy usuly — intellektual ýaryş geçirmekdir» — diýip, Wrubel çäräniň açylyşynda belledi.
Intellektual ýaryş ýokarda ady agzalan uniwersitetiň talyp ýaşlaryny öz içine alýan bäş topary ýygnady.
Pikirlenmek üçin bir minut wagt, 10 soragdan ybarat iki tapgyr — intellektual oýunda Ýewropa Birleşiginiň döwletleri bilen baglanyşykly dürli ugurlara degişli soraglar bardy.
Ýaryşlaryň jemleri boýunça bilgirlere ýaryşy gurnaýjylaryň ýadygärlik sowgatlary gowşuryldy.
ORIENT habarlar
