Türkmen paýtagtynda "Baky polkuň" ýörişi geçirildi
9-njy maý, sişenbe güni Aşgabatda A.S.Puşkin adyndaky türkmen-rus mekdebiň çäginde «Baky polkuň» ýörişi geçirildi. Geçirilmegi däbe öwrülen bu çärä 1 200 adam gatnaşdy. Mekdebiň mugallymlary we okuwçylary Beýik Watançylyk urşuna gatnaşan atalarynyň, eneleriniň, mama-babalarynyň we beýleki garyndaşlarynyň portretleri bilen mekdebiň daşynda ýöriş guradylar.
Bu çäre Russiýa Federasiýasynyň Aşgabatdaky ilçihanasynyň başlangyjy bilen guraldy. Çäräniň öňýanynda geçirilen mitingde Russiýanyň diplomatik wekilhanasynyň geňeşçisi ýygnananlary Ýeňiş güni bilen gutlady. Ol Türkmenistanyň Prezidentine ýurdumyzda faşizmi ýeňen ata-babalarymyzyň umumy edermenliginiň taryhynyň hatyralanýandygy üçin minnetdarlyk bildirdi.
Taryhçylaryň berýän maglumatlaryna görä, Türkmenistandan 70 müňden gowrak esger ordenler we medallar bilen sylaglandy, olaryň 104-sine Sowet Soýuzynyň Gahrymany diýen hormatly at dakyldy, 15 adam bolsa “Şöhrat” ordeniniň doly eýesi boldy. Tylda galan watandaşlarymyz bolsa Goranmak gaznasyna 170 million rubl nagt tabşyrdylar. Türkmen zenanlary 7 ýarym tonna golaý altyn-kümüş şaý- seplerini ýeňşiň hatyrasyna bagş etdiler. Bu bolsa tutuş Soýuz boýunça toplanan gymmat bahaly metallaryň 80%-ini emele getirdi. Ene- mamalarymyzyň tabşyran şaý-seplerinden tank kolonnalarynyň 5-si we söweş uçarlarynyň 7 eskadrony guruldy.
ORIENT news
