Maryda Eýranyň Baş konsullygy açyldy
Eýran Yslam Respublikasynyň täze Baş konsuly Abdolmajid Kamju ýurdumyzyň Mary şäherinde öz wezipesine girişdi. 5-nji maýda, anna güni eýranly diplomat Türkmenistanyň Daşary işler ministriniň orunbasary Berdinyýaz Mätiýewe öz Konsullyk patentini gowşurdy, ol hem öz gezeginde Kamjuny işe başlamagy bilen gutlady we konsullyk wezipelerini ýerine ýetirmäge rugsat berdi.
Türkmen daşary syýasat edarasynyň saýtynda habar berlişi ýaly, duşuşygyň dowamynda taraplar Mary welaýaty bilen Horasan-e-Rezawi welaýatynyň arasynda söwda we ykdysady ugurda we konsullyk hyzmatlarynda ýola goýlan gatnaşyklara ýokary baha berdiler. Diplomatlar, şeýle hem Türkmenistan bilen Eýranyň syýasy, ykdysady we gumanitar ugurlardaky hyzmatdaşlygynyň geljegini ara alyp maslahatlaşdylar we ýylsaýyn ösýän ikitaraplaýyn gatnaşyklary netijeli diýip atlandyrdylar. Şeýle hem gepleşiklerde ulag, söwda we energetika pudagynda türkmen-eýran hyzmatdaşlygyny has-da giňeltmegiň zerurlygy barada pikir alşyldy. Taraplar iki ýurduň serhetýaka etraplarynyň dolandyryş merkezleriniň ýolbaşçylary derejesinde yzygiderli aragatnaşyk gurmak barada ylalaşdylar.
ORIENT news
