Janni Infantino Merkezi Aziýa amala aşyrýan saparynyň çäginde Türkmenistana geler
Halkara Futbol Assosiasiýalary Federasiýasynyň (FIFA) prezidenti Janni Infantino 4-nji maýda Türkmenistana sapar bilen geler. FIFA-nyň başlygy bir günlük saparynyň dowamynda ýurduň we milli futbol federasiýasynyň ýolbaşçylary bilen "millionlarça adamyň oýny" bolan futboluň ösüşi we özara gatnaşyklaryň geljegi barada pikir alyşar - diýip, "Türkmenistan - Altyn asyr" elektron gazeti habar berýär.
Infantino Merkezi Aziýa ýurtlaryna sapar amala aşyrýar, 2-nji maýda ol Täjigistana geldi we Duşanbe şäherinde ýerleşýän Merkezi Aziýa Futbol Assosiasiýasynyň sekizinji kongresine gatnaşdy. Bu ýerde Täjigistanyň Futbol federasiýasynyň prezidenti Rustam Emomali gaýtadan CAFA-nyň prezidenti wezipesine täze dört ýyllyk möhlete saýlandy.
Şeýle-de, kongressiň barşynda Türkmenistanyň Futbol federasiýasynyň prezidenti Arslan Aýnazarow we Owganystanyň Futbol federasiýasynyň prezidenti Muhammet Yusuf Korgar CAFA-nyň wise-prezidenti wezipelerine saýlandy.
Infantino AFK-nyň başlygy Salman bin Ibrahim Al-Halifa bilen bilelikde Täjigistanyň Prezidenti Emomali Rahmon tarapyndan kabul edildi.
Şu hepde Infantino Gazagystana, Gyrgyzystana we Özbegistana hem sapar bilen barar.
ORIENT news
