Türkmenistan MA-da söwda amallaryny ýönekeýleşdirmek boýunça sebitleýin duşuşyga wekilçilik etdi
Türkmen wekiliýeti Merkezi Aziýada söwda amallaryny ýönekeýleşdirmek boýunça Milli komitetleriň Daşkentde geçen 9-njy sebitleýin duşuşygyna gatnaşdy. Bu barada Türkmenistanyň Döwlet gümrük gullugynyň saýty habar berýär.
Germaniýanyň Halkara hyzmatdaşlyk boýunça jemgyýetiniň (GIZ) taslamasynyň çäklerinde gurnalan çäräniň merkezi temasy söwda amallaryny ýönekeýleşdirmegiň meselelerini ara alyp maslahatlaşmak boldy. Hususan-da, söwda amallaryny sanlylaşdyrmak we hususy pudak üçin maglumata bolan elýeterliligi gowulandyrmak başlangyçlaryna seredildi.
Şunuň bilen baglylykda, Bütindünýä söwda merkeziniň wekilleri gatnaşyjylary golaýda Türkmenistanda döredilen Söwda portalynyň işi bilen tanyşdyrdylar.
Türkmenistanyň Döwlet gümrük gullugynyň wekilleri Halkara awtomobil ulagy birleşmesiniň bilermenleri we Özbegistanyň maliýe we ykdysadyýet ministrliginiň ýanyndaky Döwlet gümrük komitetiniň işgärleri bilen birlikde özbek-gazak araçägindäki «Ýallama» gümrük nokadyna baryp gördüler.
ORIENT habarlar
