Türkmen boksçylary Özbegistanda geçiriljek dünýä çempionatynda çykyş ederler
Türkmen türgenleri 1-nji maýdan 14-nji maý aralygynda Daşkentde (Özbegistan) geçiriljek boks boýunça dünýä çempionatynda çykyş ederler. Ýurdumyza 14 adamdan ybarat wekiliýet, şol sanda 10 türgen wekilçilik eder.
Türkmenistanyň Boks federasiýasynda ORIENT-e habar berlişi ýaly, toparyň düzümine Yhlas Gylyçjanow, Daýanç Annaseýidow, Döwlet Mukanow, Şükür Öwezow, Hursand Imankulyýew, Saparmyrat Ödäýew, Baýramdurdy Nurmuhammedow, Muhammet Babaýew, Taganmyrat Gurbanow, Baky Toýçyýew girdiler.
Türgenler tälimçi Nurmyrat Gurbanmyradowyň we onuň kömekçileri Teňilbek Jumakulowyň we Ýazmuhammet Ýazzyýewiň ýolbaşçylygynda çykyş ederler. Dünýä çempionatynyň öňüsyrasynda türkmen ýygyndy topary Daşkentde 18-nji aprelde başlanan okuw türgenleşiklerini geçirdi.
Özbegistanyň paýtagtynda geçiriljek dünýä çempionatynda 65 ýurtdan 300 türgen 13 agram derejesinde baýrakly orunlar ugrunda bäsleşer. 30-njy aprelde çempionatyň açylyş dabarasy we bije çekişlik geçiriler.
Çempionatyň baýrak gaznasy ABŞ-nyň 5,200,000 dollary bolup, ýeňijiler 200 000 dollar, kümüş medal gazananlar 100 000 dollar, bürünç medala mynasyp bolanlar 50 000 dollar alarlar.
ORIENT news
