Kuweýtde geçirilen Aziýanyň açyk Kubogynda türkmenistanly dzýudoçy kümüş medala mynasyp boldy
28-29-njy aprelde El Kuweýtde geçirilen Aziýanyň açyk Kubogynda türkmenistanly dzýudoçy Mämmedaly Açyldyýew 90 kilograma çenli agram derejesinde kümüş medala mynasyp boldy.
Ýaryşyň çärýek finalynda türkmen türgeni filippinli Jon Wiron Ferreri ýeňdi. Ýarym final duşuşygynda bolsa oňa Günorta Koreýanyň wekili Ýuçul Kimden üstün çykmak başartdy. Jemleýji oýunda türkmen dzýudoçysy gyrgyzystanly Anarbek Işenbaýewden asgyn geldi.
Açyldyýewiň bu üstünliginiň bir gün öňýanynda Türkmenistanyň başga bir sport wekili hem milli ýygyndy toparyň medallar gaznasynyň goruny köpeltdi. Maýsa Perdäýewa 57 kilograma çenli agram derejesinde bürünç medala mynasyp boldy.
Aziýanyň açyk Kubogy 27 ýurtdan 156 dzýudoçyny (116 erkek we 40 zenan) El Kuweýtde ýygnady. Bu ýaryşda Türkmenistana 14 türgen wekilçilik edýär.
ORIENT news
