Özbegistanyň prezidenti Bahtiýor Saidowy daşary işler ministri wezipesine tassyklady
Özbegistanyň prezidenti Bahtiýor Saidowy daşary işler ministri wezipesine tassyklady. Ozal DIM-niň täze baştutanynyň dalaşgärligi Oliý mejlisiň kanun çykaryjy palatasynyň deputatlary tarapyndan makullanypdy.
2022-nji ýylyň 30-njy dekabrynda Özbegistanyň daşary syýasat edarasynyň baştutany wezipesini ýerine ýetiriji edilip bellenmezden öňürti, ol ýurduň milli bilim ministri bolupdy. 2017-2021-nji ýyllarda bolsa Özbegistanyň HHR-daky ilçisi hem-de şol bir wagtyň özünde rezidensiýasy Pekinde ýerleşýän Mongoliýadaky we Filippindäki ilçisi bolup işläpdi.
Şeýle hem Saidow Ministrler Kabinetinde, Özbegistanyň Daşary ykdysady aragatnaşyklar, maýa goýumlar we söwda ministrliginde, şeýle hem «Uzbekýeňgilsanoat» kärhanasynda ýolbaşçy wezipeleri eýeläpdi.
ORIENT habarlar
