Türkmen ýüzüjileri DÇ-2023 saýlama ýaryşynda 10 medal gazandylar
Türkmen ýüzüjileri Daşkentde (Özbegistanda) tamamlanan dünýä çempionatynyň saýlama ýaryşynda dürli derejedäki 10 medal gazandylar.
ORIENT-e Türkmenistanyň Sportyň suw görnüşleri federasiýasynda habar bermeklerine görä, ýaryşlaryň tamamlaýjy gününde türkmen türgenleri iki medal -bir kümüş we bir bürünç medal gazandylar.
Halkara derejeli sport ussady Mergen Ataýew 50 metr aralyga arkanlaýyn ýüzmekde aralygy 27.28 sekuntda geçip, kümüş medal gazandy.
Bürünç medaly türkmen ýygyndysynyň gaznasyna 50 metr aralyga arkanlaýyn ýüzmekde (32.21 sekunt) Aýnur Primowa getirdi.
Şeýlelikde, ýaryşlaryň jemleri boýunça türkmen ýüzüjileri 10 medal – 4 altyn, 4 kümüş we 2 bürünç medal gazandylar.
Türkmen ýüzüjileri Wladimir Nowikowyň we Mark Pilýuginiň ýolbaşçylygynda çykyş etdiler.
18-22-nji aprel aralygynda Daşkentde geçen saýlama ýaryşa Türkmenistandan, Özbegistandan we Täjigistandan 265 ýüzüji (196 erkek we 69 zenan) gatnaşdy.
ORIENT habarlar
