“Awtowaz” “Lada Vesta” kysymly awtoulagyň täze neslini Özbegistanda ýygnanmagy meýilleşdirýär
“Awtowaz” “Lada Vesta” kysymly awtoulagyň täzelenen wersiýasyny Özbegistanda ýygnamagy meýilleşdirýär. Bu barada “Innoprom. Merkezi Aziýa” Halkara senagat sergisinde Russyýanyň awtoulag gurluşygy kompaniýasynyň Prezidenti Maksim Sokolow mälim etdi.
“Biz häzirden awtoulaglarymyzyň ýygnalmagy boýunça bilelikdäki meýilnamalary gözden geçirýäris. Özem ol flagman modeli – “Lada Vestanyň” täze nesli bolar" – diýdi.
Geljekde bu kompaniýa Özbegistanda awtoulag ýygnamagyň lokalizasiýa derejesini çuňlaşdyrmak isleýär. Gürrüň kebşirlemek we reňklemek hakda barýar. Sokolow taraplaryň bu mesele boýunça gepleşiklere başlandygyny aýtdy.
Özbegistanda “Lada” awtoulaglaryny yzygiderli ýygnamak işi 2021-nji ýylda ýola goýuldy. Ol “Jizak” erkin ykdysady zolagynda ýerleşýän ADM Jizzakh awtoulag zawodynda gurnaldy. Hünärmenleriň hasaplamalaryna laýyklykda, 2023-nji ýyla çenli ýurtda ýylda “Lada” kysymly awtoulagyň dürli modelleriniň 5000-e golaýy satylýardy.
ORIENT news
