IMEO-nyň baştutany Türkmenistanyň metanyň zyňylmalaryny azaltmak babatyndaky mümkinçiligi barada gürrüň berdi
Metanyň zyňylmalary boýunça Halkara obserwatoriýasynyň (IMEO) baştutany Manfredi Kaltadžiron Dubaýda, BAE-de halkara maýa goýum forumynda çykyş etmek bilen, türkmen nebit-gaz pudagynyň metanyň zyňylmalaryny kemeltmekde ýokary mümлinçiliginiň bardygyny belledi.
Bilermeniň sözlerine görä, metanyň umumydünýä zyňylmalarynyň 6% bütin dünýäde nebitiň we gazyň paýyna düşýär. Netijeleri ýumşatmak mümkinçiligi barada aýdylanda bolsa gazylyp alynýan ýangyçdan metanyň zyňylmagynyň 70% golaýyny bar bolan tehnologiýalaryň kömegi bilen we haýsydyr bir çykdajy etmezden azaldyp bolýar.
Metanyň zyňylmagy boýunça Halkara obserwatoriýasy Türkmenistana BMG-niň howanyň üýtgemegi boýunça Bütindünýä maslahatynyň COP-28 öňüsyrasynda metanyň zyňylmalaryny kemeltmek babatynda öz mümkinçiligini ýerine ýetirmäge kömek edip biljek degişli gurallara eýedir – diýip, Kaltadžiron belledi.
Metanyň zyňylmagy boýunça Halkara obserwatoriýasy – bu ÝUNEP tarapyndan goldanylýan başlangyçdyr, ol dürli pudaklarda we sebitlerde metanyň zyňylmagy baradaky maglumatlary ýygnaýar we seljerýär. IMEO metanyň zyňylmagyny kemeltmek we munuň üçin nähili hereketleri etmelidigi barada her ýyl hasabatlary neşir edýär.
Şeýle hem obserwatoriýa metan meselesi barada habardarlylygy ýokarlandyrmak we onuň ýumşadylmagyna ýardam etmek üçin hökümet, hususy pudak we ylmy jemgyýet ýaly dürli hyzmatdaşlar bilen gatnaşyklary saklaýar.
ORIENT habarlar
