Dragon Oil ýakyn 15 ýylda Türkmenistana 8 mlrd amerikan dollaryndan az bolmadyk maýa goýmagy meýilleşdirýär
Türkmenistanyň täze reformalary, milli kanunçylygyň döwrebaplaşdyrylmagy ýurt bilen maýa goýum gatnaşygyny ep-esli giňeltmäge ýardam edýär, sebäbi ilkinji nobatda maýa goýumçylar goýumlardan geljek girdejini gözden geçirýärler, şeýle hem intellektual aktiwleriň transferi barada pikir edýärler. Bu barada Dubaýyň Ýerine ýetirji geňeşiniň başlygynyň orunbasary Ahmed bin Said Al Maktum Türkmenistanyň nebit-gaz maýa goýum forumynyň plenar sessiýasynda çykyş etmek bilen aýtdy.
Ol soňky wagtda bu ugurda işewürligi we onuň netijeliligini ösdürmek üçin möhüm ädimleriň ädilendigini we Türkmenistanda amatly iş gurşawyny döretmekdäki gowulandyrmalaryň gatnaşyklaryň işjeňleşmegine ýardam edendigini aýtdy.
— 23 ýyldan gowrak bilelikdäki işiň dowamynda Dragon Oil kompaniýasy Türkmenistanyň nebit ýataklaryny işlemek taslamalaryna 8 milliard dollardan gowrak maýa goýdy we ýakyn 15 ýylyň dowamynda ýene-de iň azyndan şonça mukdarda maýa goýmaga taýýardyr – diýip, Ahmed bin Said Al Maktum beýan etdi.
Arap işewürliginiň işjeň bolup biljek esasy ugurlarynyň biri hökmünde ol energetika pudagynyň özgerdilmegini we Türkmenistanyň hökümetiniň energiýanyň gaýtadan dikeldilýän çeşmelerine geçmek başlangyjynyň goldawyny aýtdy, BAE-niň gün, ýadro, wodorod we beýlekiler ýaly energetika görnüşlerini ulanmakda uly tejribesiniň bardygyny belledi.
Al Maktum şol bir wagtda bilimi we tejribäni bermek arkaly türkmen bazarynyň daşary ýurt maýa goýumçylary üçin açyklygyny ýokarlandyrmak arkaly hyzmatdaşlygyň giňeldilmegi barada aýtdy.
Sözüniň soňunda ol öz maşgalasy bilen Türkmenistana, Awaza – «syýahatçylyk üçin, işjeňlik üçin ajaýyp ýere» gelip görmek isleýändigini sözüniň üstüne goşdy.
ORIENT habarlar
