Türkmenistan we Gyrgyzystan gümrük işi babatynda ylalaşyk baglaşmagy meýilleşdirýärler
Türkmenistan bilen Gyrgyzystanyň arasynda gümrük işi babatynda döwletara ylalaşygyny baglaşmagyň meseleleri Türkmenistanyň Döwlet gümrük gullugynyň başlygy Maksat Hudaýkulyýewiň Gyrgyzystanyň Türkmenistandaky ilçisi Azizbek Madmarow bilen duşuşygynda ara alnyp maslahatlaşyldy. Bu barada Türkmenistanyň gümrük edarasynyň resmi saýty habar berýär.
Resminama iki ýurduň gümrük edaralarynyň arasyndaky hyzmatdaşlygy kämilleşdirmek üçin hukuk esasyny goýmaga niýetlenendir. Duşuşygyň gün tertibine şeýle hem maglumatlary alyşmak, statistiki maglumatlary deňeşdirmek, şeýle hem ikitaraplaýyn haryt dolanyşygyny artdyrmak üçin iki ýurduň üstaşyr mümkinçiligini ýeterlik ulanmak meseleleri girizildi.
Türkmenistanyň Döwlet gümrük gullugynyň başlygy gyrgyz ilçisine ýurtda gümrük hyzmatlaryny döwrebaplaşdyrmaga we Türkmenistanyň eksport mümkinçiligini ýokarlandyrmaga gönükdirilen işler barada habar berdi.
ORIENT habarlar
