Türkmenistan 2024-nji ýylda SPECA-da öz başlyklyk konsepsiýasyny taýýarlar
Şenbe güni geçirilen hökümet mejlisinde wise-premýer, Daşary işler ministri Raşid Meredow 2024-nji ýylda Türkmenistanyň SPECA-da başlyklyk etmegi we degişli konsepsiýany taýýarlamak boýunça iş alyp barmagy teklip etdi.
Bu teklip, BMG-nyň Merkezi Aziýanyň ykdysadyýetleri üçin ýörite maksatnamasy - SPECA ýaly abraýly sebit platformasynda Türkmenistanyň halkara başlangyçlaryny öňe sürmäge gönükdirilendir.
Şu hepdäniň başynda, 17-nji aprelde, Türkmenistanyň wekiliýeti Žewada Maksatnamanyň gatnaşyjy-ýurtlarynyň ministrler duşuşygynyň işine gatnaşdy.
Onda 2023-nji ýylda Azerbaýjanyň SPECA başlyklyk eden döwründe ýerine ýetirilmeli işler ara alnyp maslahatlaşyldy.
Ozal Türkmenistan 2019-njy ýylda SPECA-a başlyklyk edipdi. Şonda Aşgabatda ýokary derejeli halkara çäreleri - SPECA günleri geçirildi.
Şeýle hem, Meredow, halkara bilermenleriniň gatnaşmagynda ykdysadyýetiň sanly we «ýaşyl» öwrülişigi barada maý aýynda «tegelek stol» guramagy teklip etdi. Beýleki birnäçe teklip metbugat pudagynda hyzmatdaşlygy giňeltmek, Bütindünýä intellektual eýeçilik guramasynyň akademiýasy, şeýle hem BSG bilen belli bir ugurda hyzmatdaşlygy ýola goýmak bilen baglanyşyklydy.
Prezidentimiz Serdar Berdimuhamedow bu teklipleri tassyklap, Türkmenistanyň ähli gyzyklanýan daşary ýurt we halkara hyzmatdaşlary bilen işjeň hyzmatdaşlygy ösdürmegi maksat edinýändigini aýtdy we ýolbaşçylara bu ugurda yzygiderli işleri dowam etdirmegi tabşyrdy.
ORIENT news
